લોગ વિચાર :
પેઈનકિલરની વધતી જતી જરૂરિયાતને કારણે એનાલજેસિક્સ થેરાપી માર્કેટના વિકાસને વેગ મળ્યો છે, જે છેલ્લા ચાર વર્ષમાં 43 ટકા વધીને 503 કરોડનો થઈ ગયો છે. તબીબી પ્રેક્ટિશનરોએ આ વધારો પેઈનકિલર દવાઓના વધારે વપરાશને કારણે થયો હોવાનું જણાવે છે.
ફાર્મરેકના ડેટા અનુસાર, ગુજરાતમાં પેઇન અને એનાલજેક્સ સેગમેન્ટ જૂન 2020 માટે મૂવિંગ એન્યુઅલ ટર્નઓવર એમએટી માં 354 કરોડથી વધીને જૂન 2024 માં 42 ટકાના વધારા સાથે 503 કરોડનું થયું છે. જૂન 2024 ના એમએટી માટે, આમાંની લગભગ 74 ટકા દવાઓ ડિક્લોફેનાક, એસેક્લોફેનાક, આઇબુપ્રોફેન અને ટ્રામાડોલ જેવી પેઈનકિલર દવાઓ હતી.
જે લગભગ 377 કરોડની હતી. તણાવ અને અસ્વસ્થતા અને લોકડાઉન દરમિયાન શારીરિક ગતિવિધિઓના અભાવને કારણે રોગચાળા પછીથી પેઈનકિલર દવાઓની માંગમાં સતત વધારો થયો છે, રસાયણશાસ્ત્રીઓ અને તબીબી પ્રેક્ટિશનરો કહે છે કે બેઠાળુ જીવન, કસરતનો અભાવ અને લેપટોપ અને મોબાઇલ ફોન જેવા ઉપકરણોનો વધુ પડતો ઉપયોગ સ્નાયુઓના દુખાવામાં ઉભો કરે છે.
અમદાવાદ સ્થિત ઓર્થોપેડિક અને જોઇન્ટ રિપ્લેસમેન્ટના સર્જન ડો. મહર્ષિ ભટ્ટે જણાવ્યું હતું કે " પેઈનકિલર દવાઓનો દુરુપયોગ દરેક વયજૂથના દર્દીઓમાં જોવા મળે છે. ગ્રામીણ વિસ્તારોમાં, લોકો વિચાર્યા વગર પ્રિસ્ક્રિપ્શન વિના પેઇનકિલરનો ઉપયોગ કરે છે.
અજ્ઞાનતાને કારણે લોકો સામાન્ય દુખાવા માટે પણ માટે ઘણીવાર ડિક્લોફેનાક અથવા ટ્રામાડોલ જેવી વધારે પાવરની પેઈનકિલર દવાઓ લેતા હોય છે. લોકોને મોટેભાગે પગનાં તળિયાંને લગતો દુખાવો , પીઠનો દુખાવો, સર્વાઇકલનો દુખાવો વગેરે દુખાવા થતાં હોય છે, જે બેઠાડું જીવનશૈલીના કારણે થાય છે,"
મહર્ષિ ભટ્ટે વધુમાં જણાવ્યું હતું કે "આરામ અને ફિઝીયોથેરાપી આ દુખાવો ઉકેલવા માટે ચાવીરૂપ છે પરંતુ તેના બદલે, દર્દીઓ નુકશાનકારક પેઈનકિલર તરફ વળે છે. કીડની ફેઈલના ઓછામાં ઓછા ત્રીજા ભાગના કિસ્સાઓમાં વધારે પાવરની પેઇનકિલરના લાંબા સમય સુધી સેવનને કારણે થતાં હોય છે. "
કોમર્શિયલ ફાર્મારેકના વાઇસ પ્રેસિડેન્ટ શીતલ સાપલે જણાવ્યું હતું કે, " પ્રિસ્ક્રિપ્શનમાં વધારો થવા પાછળ વાયરલ અને બેક્ટેરિયલ ઈન્ફેકશનના વધતા કેસ પણ મુખ્ય છે. પેઈનકિલર દવાઓ દાખલા તરીકે, પેરાસીટામોલ જેવી દવાઓ ઘણીવાર એવી બિમારીઓ સાથે સૂચવવામાં આવે છે જે શરીરમાં દુખાવો અને તાવનેં કારણ બને છે.
ફેડરેશન ઓફ ગુજરાત સ્ટેટ કેમિસ્ટ એન્ડ ડ્રગિસ્ટ એસોસિએશનના અધ્યક્ષ અલ્પેશ પટેલે જણાવ્યું હતું કે " લોકો દુખાવાને નિયંત્રિત કરવા માટે પોતાની રીતે દવાઓ લે છે. "ગુજરાતમાં લગભગ 35000 ફાર્મસીઓ છે.
દરેક સ્ટોર દરરોજ સરેરાશ 10 સ્ટ્રીપ્સ પેઇનકિલર્સનું વેચાણ કરે છે જ્યારે ગ્રામીણ વિસ્તારોમાં તેનો ઉપયોગ મોટાભાગે થાય છે, શહેરી વિસ્તારોમાં લોકો ઈન્ટરનેટ પર જોઈને દવાઓ લેતા હોય છે."