લોગ વિચાર :
ભૂતાનના રાજા અને વડાપ્રધાનની રાહબરી હેઠળના એક ઉચ્ચ-સ્તરીય પ્રતિનિધિમંડળની ગુજરાતની તેમની બે દિવસની મુલાકાતના ભાગરૂપે અદાણી ગ્રુપની ફ્લેગશિપ ઇન્ફાસ્ટ્રક્ચર પ્રોજેક્ટ સાઇટ્સ-મુન્દ્રા અને ખાવડાની આજે મુલાકાત લીધી હતી. અદાણી સમૂહ સાથે વિવિધ ક્ષેત્રોમાં વ્યાપક સહયોગની તકો શોધવાનો તેમની આ મુલાકાતનો પ્રાથમિક ઉદ્દેશ હતો.
ભારતનું પાડોશી રાષ્ટ્ર ભૂટાન વિશાળ કક્ષાએ ઈન્ફાસ્ટ્રક્ચર પ્રોજેક્ટ્સ વિકસાવવામાં અદાણીની કુશળતાના આધાર પર સહયોગ કરવાનું લક્ષ્ય ધરાવે છે. પરસ્પર હિતના મુખ્ય ક્ષેત્રોમાં હાઈડ્રોપાવર, ટ્રાન્સમિશન લાઇન, શહેરી વિકાસ જેમ કે ગેલેફુ માઇન્ડફુલનેસ સિટી, સિમેન્ટ ઉદ્યોગ, ગ્રીન હાઇડ્રોજન અને રિન્યુએબલ એનર્જીની બાબતોમાં એકબીજાના સહયોગ વિષે આ મુલાકાત દરમિયાન વિગતે ચર્ચા કરવામાં આવી હતી. અદાણી ગ્રુપે 570 મેગાવોટ ક્ષમતાના વાંગછુ હાઇડ્રોપાવર પ્રોજેક્ટના વિકાસ માટે ડુક ગ્રીન પાવર કંપની (ડીજીપીસી) સાથે અગાઉથી જ સમજૂતી કરાર (એમઓયુ) કર્યા છે.
અદાણીના પ્રોજેકટ્સની રાજાની આ મુલાકાત દરમિયાન ડીજીપીસીના અધિકારીઓ પણ જોડાયા હતા. ભૂટાનની અર્થવ્યવસ્થામાં તેના જીડીપી અને નિકાસ આવકમાં નોંધપાત્ર યોગદાન આપી રહેલ હાઇડ્રોપાવરની ભૂમિકા નિર્ણાયક હોવાથી આ પહેલ દીશાસૂચક છે ભૂટાન તેની ઉત્પાદિત વીજળીનો નોંધપાત્ર હિસ્સો ભારતમાં નિકાસ કરી ભારતની ઊર્જા જરૂરિયાતોને હળવી કરવામાં મદદ કરે છે.
ભૂટાન પાસે નોંધપાત્ર એવી લગભગ 30,000 મેગાવોટની સંભવિત ક્ષમતા છે જેમાં અંદાજે 24,000 મેગાવોટ આર્થિક રીતે શક્ય માનવામાં આવે છે.1960ના દાયકાથી ભારત દ્વારા સમર્થિત ભૂટાનના હાઇડ્રોપાવર સેક્ટરનો વિકાસ તેના આર્થિક વિકાસ માટે મહત્ત્વપૂર્ણ રહ્યો છે. આ ક્ષેત્રમાં શ્રીલંકા અને બાંગ્લાદેશ સરકારો સાથે તાજેતરમાં સહયોગ સાધવામાં આવ્યો છે.
અદાણી ગ્રુપ પોતાની મજબૂત ઈન્ફ્રાસ્ટ્રક્ચર ક્ષમતાઓ અને નિપૂણતાના આધારે ભારતના પાડોશી રાષ્ટ્રોને તેમના ટકાઉ વિકાસના પ્રયાસોમાં સક્રિયપણે સહયોગ આપી નેટ-ઝીરો કાર્બન ઉત્સર્જનને હાંસલ કરવાના વૈશ્વિક લક્ષ્યમાં નોંધપાત્ર યોગદાન આપી રહ્યું છે.
સૌથી મોટા વિદેશી સીધા રોકાણનું પ્રતિનિધિત્વ કરતા અને શ્રીલંકાના ઇતિહાસમાં અત્યાર સુધીના સૌથી મોટા પાવર પ્રોજેક્ટ એવા વિન્ડ પાવર સ્ટેશન માટે શ્રીલંકાની સરકાર સાથે સીમાચિહ્નરૂપ 20-વર્ષ માટે તાજેતરમાં કરવામાં આવેલા કરારનો આ સહયોગમાં સમાવેશ થાય છે.
વધુમાં અદાણી ગ્રુપે ઝારખંડમાં ભારતના 1600 મેગાવોટના પ્રથમ ટ્રાન્સ-નેશનલ પાવર પ્રોજેક્ટ ગોડ્ડા પાવર પ્લાન્ટમાંથી બાંગ્લાદેશમાં વીજળીની નિકાસનો આરંભ કરીને પ્રાદેશિક ઉર્જા સુરક્ષા અને ટકાઉપણું વધારવાની તેની પ્રતિબદ્ધતાને વધુ મજબૂત બનાવી છે.
ભૂટાનના પ્રતિનિધિમંડળ અને અદાણી ગ્રુપ વચ્ચે ચાલી રહેલી ચર્ચાઓ ટકાઉ વિકાસના લક્ષ્યોને આગળ વધારવા સાથે વ્યૂહાત્મક ભાગીદારી દ્વારા પ્રાદેશિક આર્થિક વિકાસને પ્રોત્સાહન આપવા માટેની સહિયારી પ્રતિબદ્ધતા દર્શાવે છે.